Një operacion i gjerë policor është zhvilluar gjatë natës në zonën e fshatrave të Lumit të Vlorës, ku forcat e rendit kanë ndërhyrë në disa pika të ndryshme dhe kanë kryer kontrolle intensive. Sipas burimeve paraprake, nga aksioni janë shoqëruar dhe arrestuar disa persona, mes tyre edhe një individ i shpallur në kërkim ndërkombëtar.
Gjatë operacionit janë sekuestruar katër armë zjarri dhe një mjet i blinduar, ndërsa aksioni është drejtuar nga drejtori i Policisë së Qarkut Vlorë, Edvin Ndreu. Në terren kanë marrë pjesë forca të shumta policore, në kuadër të një ndërhyrjeje të koordinuar.
Policia e Shtetit ka dalë me një komunikim zyrtar, ku pritet të jepen detaje të plota mbi rezultatet e operacionit, personat e arrestuar dhe materialet e sekuestruara. Hetimet vijojnë për zbardhjen e plotë të aktivitetit të dyshuar kriminal.
Në kuadër të operacionit të koduar “Grupi”, janë vënë në pranga shtetasit:
* Florian Shala alias Florian Alliaj
* Neritan Dalipaj alias Neritan Qejvanaj
* Aleksandër Dula alias Aleksandër Thomai alias Ilir Dula
* Miço Beqaraj
* Turi Aligjoni
* Dritan Çelaj
Autoritetet vijojnë punën për dokumentimin e plotë të çështjes dhe verifikimin e rolit të secilit prej të arrestuarve në aktivitetin e dyshuar kriminal.
