Presidenti Donald Trump ka ndërmarrë një sërë veprimesh të shpejta dhe të gjera në 100 orët e para të mandatit të tij të dytë, duke nënshkruar dhjetëra urdhra ekzekutivë që prekin fusha të ndryshme si emigracioni, drejtësia, energjia dhe politikat sociale.

Masat kryesore të ndërmarra nga Trump:

•Imigracioni dhe Siguria Kufitare – Trump ka shpallur një emergjencë kombëtare në kufirin jugor dhe ka urdhëruar që të mohohet e drejta e nënshtetësisë për fëmijët e emigrantëve të paligjshëm ose me viza të përkohshme. Gjithashtu, bandat dhe kartelet janë cilësuar si organizata terroriste të huaja.

•Mjedisi dhe Energjetika – Presidenti ka tërhequr sërish SHBA nga Marrëveshja e Parisit për klimën dhe ka shpallur një “emergjencë kombëtare të energjisë”, duke lehtësuar shfrytëzimin e lëndëve djegëse fosile.

•Shëndetësia – Trump ka nënshkruar një urdhër ekzekutiv për të nisur tërheqjen e SHBA nga Organizata Botërore e Shëndetësisë (OBSH), duke e cilësuar atë si një institucion të politizuar.

•Faljet Presidenciale – Ai ka dhënë falje për rreth 1,600 persona të arrestuar për trazirat në Kapitolin e SHBA më 6 janar 2021 dhe ka lehtësuar dënimet për anëtarët e grupeve të ekstremit të djathtë të dënuar për kryengritje.

•Politikat Sociale – Trump ka firmosur një urdhër që njeh ligjërisht vetëm dy gjini, mashkull dhe femër, si dhe ka ndaluar të gjitha programet e “diversitetit, barazisë dhe përfshirjes” në institucionet federale.

Vendimet e Trump kanë shkaktuar reagime të forta në SHBA dhe jashtë saj, duke e ndarë opinionin publik mes mbështetësve që i shohin si përmbushje të premtimeve të tij dhe kritikëve që paralajmërojnë për pasoja të rënda sociale dhe ekonomike.