Detaje të reja kanë dalë në lidhje me veprimet e 23-vjeçarit, Mark Samson, pas vrasjes së studentes me origjinë shqiptare, Ilaria Sula. Në vendimin e gjyqtares Antonella Minunni për caktimin e masës së arrestit ndaj filipinezit, thuhet se ai ka treguar një qëndrim të jashtëzakonshëm të vetëkontrollit pas vrasjes së 22-vjeçares.

Edhe pse më parë kishte shprehur se nuk mund të jetonte pa Ilarian dhe nuk mund ta imagjinonte jetën pa të, pas krimit, Mark Samson arriti të kthehej në normalitet dhe të menaxhonte situatën me qetësi. Gjyqtarja Minunni e ka nënvizuar këtë vetëkontroll të fortë dhe të qartë të tij pas ngjarjes.

Pas vrasjes, Samson ka tentuar të justifikojë veprimin e tij, duke e cilësuar vrasjen si një “gjest zemërimi dhe xhelozie”, duke thënë se presioni për të marrë rezultate të mira në universitet ishte një nga arsyet që e kishte çuar në këtë akt.

Hetimet kanë zbuluar se, pavarësisht krimit të tmerrshëm që kishte kryer, ai ka vazhduar të takojë shoqen e Ilarisë për të ngrënë një piadinë dhe ka diskutuar për çështje të thjeshta dhe banale. Samson nuk ka treguar shenja pendimi apo shqetësimi për veprimin që kishte kryer. Për më tepër, ai ka dërguar mesazhe babait të Ilarisë, duke u shtirur si vajza e tij, dhe ka vazhduar të komunikonte me shoqet e Ilarisë, duke i bërë ato të besonin se ajo ishte ende gjallë.