Qeveria shqiptare ka miratuar strukturën e re organizative dhe numrin e punonjësve për shërbimin e gjendjes civile në të gjithë vendin. Vendimi është publikuar në Fletoren Zyrtare dhe parashikon riorganizimin e zyrave të gjendjes civile pranë bashkive dhe prefekturave të qarqeve.

Sipas vendimit, në Qarkun Vlorë do të funksionojnë gjithsej 15 zyra të gjendjes civile, me një total prej 35 punonjësish, të shpërndarë në disa bashki dhe njësi administrative.

Në Bashkinë Vlorë, struktura e re përfshin njësitë e shërbimit: Vlorë R1, Vlorë R2 + Orikum, Vlorë R3, Vlorë R4, Vlorë R5 + Qendër Vlorë, si dhe njësitë Novoselë dhe Shushicë.

Ndërkohë, në Bashkinë Selenicë shërbimi i gjendjes civile do të mbulojë zonat Selenicë, Armen, Brataj, Kote, Sevaster dhe Vllahinë. Në Bashkinë Himarë përfshihen njësitë Himarë, Hore-Vranisht dhe Lukovë.

Në pjesën jugore të qarkut, struktura e re parashikon edhe zyrat në Sarandë dhe Ksamil, Konispol, Markat dhe Xarrë, si dhe zonat Finiq, Mesopotam, Dhivër dhe Livadhja. Një tjetër zyrë do të mbulojë Delvinë dhe Vergo.

Vendimi përcakton gjithashtu se transferimi, depozitimi dhe administrimi i akteve dhe dokumenteve të gjendjes civile do të kryhet në përputhje me legjislacionin në fuqi për arkivat.

Struktura e re do të hyjë në fuqi pas botimit në Fletoren Zyrtare, ndërsa zbatimi i saj do të nisë nga data 30 mars 2026.