Policia e Gjirokastrës ka arrestuar një 19-vjeçar nga Pakistani, i cili po transportonte me automjet 5 emigrantë nga vendet e treta, të cilët synonin të kalonin ilegalisht kufirin me Greqinë. I arrestuari, Asad Ali, do të përballet me akuzën për “Ndihmën për kalim të paligjshëm të kufijve”.
Operacioni i koduar “Turn 1” u finalizua nga Seksioni për Hetimin e Trafiqeve të Paligjshme, në bashkëpunim me Sektorin e Policisë Rrugore dhe Prokurorinë e Gjirokastrës. Gjatë operacionit, në aksin rrugor “Tepelenë-Memaliaj”, policia i bëri shenjë ndalimi automjetit të dyshuar. Pasi shoferi nuk i është bindur ndalimit dhe ka vazhduar lëvizjen me shpejtësi, ai e ka braktisur automjetin, por pas veprimeve të shpejta hetimore, u identifikua dhe u arrestua. Automjeti u sekuestrua si provë materiale.
