Policia e Kukësit ka vënë në pranga dy shtetas, A. C., 28 vjeç dhe A. D., 22 vjeç, pas kapjes së tyre në flagrancë me lëndë narkotike dhe armë të ftohta. Shërbimet e Policisë, në bashkëpunim me Forcën e Posaçme “Shqiponja”, ndaluan automjetin që udhëhohej nga shtetasi A. C., me pasagjer shtetasin A. D., të dy banues në Kukës.

Gjatë kontrollit, policia gjeti sasi të dyshuar të lëndës narkotike cannabis sativa të ndara në doza, që besohet se ishin për shpërndarje me qëllim shitjen. Po ashtu, u sekuestruan edhe 2 doreza metalike të gjetura te shtetasi A. C.

Policia e Kukësit ka bërë me dije se ky operacion është pjesë e kontrolleve të vazhdueshme për goditjen e paligjshmërisë dhe rritjen e parametrave të sigurisë. Pas arrestimeve, dosja u kalua prokurorisë për akuzat e “prodhimit dhe shitjes së narkotikëve” dhe “prodhimit, mbajtjes, blerjes apo shitjes pa leje të armëve të ftohta”.