4 mijë objekte të trashëgimisë kulturore janë zbuluar në një banesë në Tiranë.

Këto vepra dyshohet se kanë qenë të vjedhura, ndërkohë që për rastin ka pasur një person të arrestuar.

Burime bëjnë me dije se personi i arrestuar është shtetasi Artan Koçiu, i cili dhe më herët ka qenë i arrestuar për të njëjtën vepër penale.

Në dëshminë e tij pas ndalimit dhe shoqërimit, në komisariat, Koçiu përpara OPGJ-ve ka deklaruar se është restaurues i veprave të artit. Më tej ai ka shtuar se veprat e artit nuk i ka vjedhur por është koleksionues i tyre dhe i ka blerë ato.

Njoftimi i policisë:

Nga specialistët për hetimin e trafiqeve të paligjshme ne DVP Tiranë pas një informacioni dhe verifikimesh disa ditore zbulohet një banesë ku gjendeshin rreth 4000 objekte, një pjesë e mirë e të cilave dyshohet të jenë objekte të trashëgimisë kulturore.

Vazhdon puna me Ministrinë e Kulturës për inventarizimin e tyre dhe përcaktimin e atyre që janë pjesë e trashëgimisë kulturore dhe përcaktimin e objekteve ku janë marrë apo vjedhur si Kishat Ortodokse në Shqipëri, Greqi e Maqedoni Veriore. Arrestohet një person me iniciale A.K.