Albert Habipaj, 62-vjeçari shqiptar i akuzuar për vrasjen e bashkatdhetarit të tij, Nikolin Nikës, ka mbetur në burg pas vendimit të gjykatës në Itali. Nikolin Nika, i cili mbante tri plagë në qafë, humbi jetën pas një hemorragjie të rëndë, ku njëra prej plagëve ishte aq e thellë sa shkaktoi vdekjen e menjëhershme. Ndërkohë, arma e ftohtë e përdorur në ngjarje, ende nuk është gjetur. Fillimisht, u dyshua për përdorimin e një thike, por një dëshmitar ka deklaruar se autori mbante një çelës, duke shtuar kështu dyshimet që ky objekt mund të jetë arma e vrasjes. Hetuesit janë duke shqyrtuar këtë hipotezë.

Albert Habipaj është marrë në pyetje nga gjyqtari pas arrestimit dhe ka përsëritur versionin e tij, duke shpjeguar se kishte pasur një debat me Nikolin Nikën, i cili përfundoi në një përplasje fizike. Ai ka theksuar se, kur u largua nga vendi i ngjarjes, e la Nikolin gjallë. Sipas Habipajt, ai ka vepruar për t’u mbrojtur. Pas përfundimit të marrjes në pyetje, gjyqtari ka konfirmuar masën e sigurisë, duke e lënë Habipajn në burg për të vazhduar hetimet.