Një avion transporti tip “Learjet 55” u rrëzua të premten në Filadelfia, vetëm 30 sekonda pas ngritjes, duke dëmtuar disa shtëpi në një zonë të populluar të qytetit.

Sipas Administratës Federale të Aviacionit (FAA), në bord ndodheshin gjashtë persona, por ende nuk ka konfirmime mbi të mbijetuar apo viktima. Banorët e zonës u tronditën nga ngjarja, ndërsa dëshmitarët raportuan një zhurmë të fortë dhe një shtëllungë të madhe tymi.

“Gjithçka që dëgjuam ishte një zhurmë e fortë dhe nuk e dinim nga po vinte. Pas pak pamë shtëllungën e madhe të tymit”, tha Jim Quinn, një banor pranë zonës ku ndodhi aksidenti.

Avioni u zhduk nga radarët në orën 18:06, pasi arriti një lartësi prej 487 metrash. Ai ishte nisur nga Aeroporti Verilindor i Filadelfias dhe kishte si destinacion qytetin e Springfildit në Mizuri. Sipas të dhënave nga “Flight Aware”, avioni ishte i regjistruar në pronësi të kompanisë “Med Jets”.

Ky aksident ndodhi vetëm dy ditë pas një tjetër tragjedie ajrore në Uashington, ku një avion i “American Airlines” me 60 pasagjerë dhe një helikopter ushtarak me tre ushtarë u përplasën në ajër, duke mos lënë asnjë të mbijetuar.

Guvernatori i Pensilvanisë, Josh Shapiro, ka ofruar mbështetje të plotë për hetimet dhe operacionet e shpëtimit. “Shteti ynë është i gatshëm të ofrojë të gjitha burimet e nevojshme për të ndihmuar në reagimin ndaj kësaj tragjedie,” deklaroi ai.

Autoritetet po hetojnë shkaqet e rrëzimit të avionit dhe vazhdojnë operacionet në vendngjarje.