Bashkëshortja e kryetarit të Bashkisë Tiranë, Erion Veliaj, Ajola Xoxa, është larguar nga Apeli i Posaçëm pas paraqitjes së saj në mëngjes, ndërkohë që seanca për shqyrtimin e ankimit të saj kundër sekuestrimit të dy llogarive bankare është shtyrë për të mërkurën. Gjykata ka kërkuar më shumë kohë për t’u njohur me disa prova të reja të paraqitura nga SPAK.

Ajola Xoxa ka theksuar se fondet dhe të ardhurat e saj janë të ligjshme dhe kanë burime të ligjshme. Ajo është lënë nën masën “detyrim paraqitje”, ndërsa bashkëshorti i saj, Erion Veliaj, ndodhet në masën “arrest me burg”.

Xoxa ka bërë rekurs në Gjykatën e Lartë për vendimin e Apelit të GJKKO-së, që ka miratuar kontrollin në bizneset e saj dhe sekuestrimin e celularit. Ajo ka kundërshtuar gjithashtu vendimin për kontrollin në apartamentin e përshtatur si magazinë në Sky Tower, i cili u realizua më 3 shkurt.