Një hetim i gjerë policor në Britaninë e Madhe ka zbuluar një skemë kriminale të sofistikuar, ku një bandë e organizuar kishte ngritur mbi 100 ferma kanabisi, duke përfituar ilegalisht energji elektrike nga rrjeti kombëtar.
Operacioni i koduar “Shkëndija”, i kryer nga Njësia Rajonale e Krimit të Organizuar Veri-Perëndimor (NWROCU), çoi në bastisjen e një ferme kanabisi me vlerë 1.2 milion paund në Bangor. Në këtë aksion, policia arrestoi dy shtetas shqiptarë, të cilët dyshohet se ishin trafikuar për të punuar në kushte shfrytëzuese.
Sipas autoriteteve britanike, banda përbëhej nga 10 persona dhe operonte nën maskën e një kompanie të regjistruar, Elev8 Civils and Utilities Ltd, duke realizuar ndërhyrje të paligjshme në rrjetin elektrik. Ata vepronin hapur, të veshur me uniforma pune dhe me sinjalistikë zyrtare, duke krijuar iluzionin se po kryenin punime të rregullta.
Hetuesit zbuluan se energjia e vjedhur ishte përdorur për të fuqizuar 100 ferma kanabisi, duke prodhuar drogë me vlerë 21 milion paund.
Operacioni policor u finalizua me zbulimin e fermës së kanabisit në një dyqan të braktisur në Bangor’s High Street në janar 2023. Pamjet nga bastisja tregojnë qindra bimë kanabisi të kultivuara brenda ambienteve të dyqanit.
Policia britanike ka paralajmëruar për një rritje të aktivitetit të grupeve kriminale në sektorin e kultivimit të drogës dhe ka shprehur angazhimin për të çrrënjosur këtë fenomen. Hetimet për grupin e arrestuar vijojnë, ndërsa priten masa të tjera kundër rrjeteve kriminale të përfshira në këtë aktivitet.
