Deputeti i Partisë Socialiste, Erion Braçe, ka bërë një deklaratë të fortë gjatë mbledhjes së Komisionit të Ekonomisë dhe Financave, duke shprehur se kjo mund të jetë një nga fjalimet e tij të fundit në këtë komision. Ai u shpreh se nuk është faji i deputetëve për situatën e vështirë që ka kaluar sektori i bujqësisë gjatë 6 viteve të fundit, duke theksuar se fajin e mbajnë ministrat e Ekonomisë.

“Si propozues i kësaj, meqë është puna ime e fundit në Kuvend, do të jem i kënaqur që kjo të votohet kundër në Kuvendin e Shqipërisë. Mos u vini në siklet fare. Nuk është faji i asnjë deputeti për këtë që ka ndodhur në këto 6 vite. Faji është i çdo ministri të Ekonomisë,” tha Braçe, duke shtuar se ministri i Financave nuk është shfaqur në komision për t’u përballur me pyetje dhe diskutime.

Ai theksoi gjithashtu se është e turpshme që ministri nuk është prezent për të diskutuar mbi këtë çështje dhe se kjo ka krijuar një situatë talljeje ndaj punës së deputetëve. “Kjo është një tallje skandaloze,” tha Braçe, duke shtuar se ka pasur një ligj të kaluar para një muaji që nuk është diskutuar fare, edhe pse ky ligj ka qenë i rëndësishëm.

Braçe përfundoi duke thënë se nuk ka interes personal në këtë çështje dhe se kjo e gjithë situatë ndodhte për shkak të emrit të tij në propozim.