Prokurorja e Lushnjës, Merita Selimi, e cila ndodhej në listën e ekzekutimeve të planifikuara nga i dënuari me burgim të përjetshëm Laert Haxhiu, është rikthyer në detyrë pas një vendimi të Komisionit të Posaçëm të Apelimit (KPA).

Në korrik të vitit 2023, Selimi u shkarkua nga Komisioni i Pavarur i Kualifikimit (KPK), por pas ankimit të saj, KPA vendosi me shumicë votash që ajo të vijojë detyrën si prokurore.

Një karrierë e gjatë në sistemin e drejtësisë

Merita Selimi ka nisur karrierën në drejtësi që prej vitit 1992, duke shërbyer për dekada në Prokurorinë e Lushnjës. Pas riorganizimit të hartës së re gjyqësore, ajo u transferua në Prokurorinë e Fierit.

Në tetor të vitit 2023, SPAK dhe policia zbuluan se Selimi ishte një nga tre emrat e drejtësisë që Laert Haxhiu kishte planifikuar të eliminonte. Ky informacion u zbulua nga dëshmia e bashkëpunëtorit të drejtësisë, Artan Tafani, dhe për pasojë, prokurorja u vendos nën mbrojtje të shtuar nga Komisariati i Lushnjës.

Hetimet për grupet kriminale

Merita Selimi ka luajtur një rol kyç në hetimet ndaj Laert Haxhiut, Orgest Bilbilit dhe Anterio Kaloshit, të cilët u akuzuan për masakrën e vitit 2017 në Lushnjë, ku mbetën të vrarë Zamir Latifi dhe Jurgen Hoxha, ndërsa u plagosën Bujar Turku dhe Marjus Xhepexhiu.

Pas dy viteve hetime, Selimi transferoi çështjen tek SPAK, duke çuar në dënimin me burgim të përjetshëm të tre të pandehurve.

Rikthimi i saj në sistemin e drejtësisë shënon një zhvillim të rëndësishëm, veçanërisht për luftën kundër krimit të organizuar në Shqipëri.