Deputetja e Partisë Demokratike, Jorida Tabaku, ka komentuar kandidimin e saj në listën e hapur të PD për zgjedhjet parlamentare të 11 majit 2025. Gjatë një interviste, Tabaku shprehu bindjen e saj për mundësinë e fitimit të kësaj sfide, duke theksuar se vendimi për të kandiduar ishte i partisë, ndërsa, si tironse që është, nuk mund të pranonte të kandidojë në një qark tjetër.

Tabaku e cilësoi këtë hap si një proces të diskutuar dhe analizuar me kohë, duke shtuar se ka pasur biseda të detajuara me familjen për angazhimin e madh që kërkon ky vendim. Ajo theksoi se ka tre fëmijë të vegjël dhe e kupton se ky angazhim do të kërkojë një përpjekje më të madhe nga ana e saj, duke pranuar se familja ka koston e saj.

Jorida Tabaku gjithashtu shpjegoi se nuk ka opsione të tjera për të përveçse të qëndrojë në Partinë Demokratike dhe se nuk e mendon asnjëherë të hapë një parti të re ose të jetë hakmarrëse.

“Ky është një angazhim i madh, por është një hap që kam marrë me shumë mendim dhe pas bisedave me ata që janë të rëndësishëm për mua,” – përfundoi Tabaku.