Shkodër – SPAK ka zbardhur detaje të reja mbi vrasjen e Fatbardh Liçit, e ndodhur më 10 gusht 2018. Safet Bajri është arrestuar si i dyshuari kryesor, ndërsa hetimet kanë zbuluar se në ngjarje mund të jetë e përfshirë edhe e dashura e tij, Eria Ago, e cila akuzohet për ndihmë në transportin e autorëve pas krimit.

Tabulatet telefonike zbulojnë lëvizjet e autorëve
Sipas dosjes hetimore, pas vrasjes, Eria Ago dyshohet se ka ndihmuar Astmer Bilalin të largohet nga Shkodra drejt Tiranës. Në këtë qytet, ai ka lënë makinën në një parking në zonën e ish-kinemës “Partizani” dhe më pas është larguar drejt Vlorës. Ndërkohë, Safet Bajri ka qëndruar në Shkodër.

Eria Ago mohon akuzat
Megjithëse provat e SPAK e lidhin Agon me ngjarjen, ajo ka mohuar çdo përfshirje, duke deklaruar se nuk ndodhej në Shkodër ditën e vrasjes.

Arrestimi i Safet Bajrit dhe analizat e ADN-së
Më 21 shkurt 2025, Safet Bajri u arrestua dhe u dërgua në paraburgim. Gjykata e Posaçme e ka lënë në arrest me burg, ndërsa SPAK ka urdhëruar analizën e ADN-së për të krahasuar provat e mbledhura në vendngjarje.

Akuzat e SPAK për të arrestuarit
SPAK ka ngritur ndaj Safet Bajrit, Behar Bajrit dhe Astmer Bilalit këto akuza:
“Vrasje me paramendim”
“Grup i strukturuar kriminal”
“Kryerja e veprave penale nga organizata kriminale”

Motivi i vrasjes: Hakmarrja për një tjetër ekzekutim
Sipas hetimeve, vrasja e Fatbardh Liçit lidhet me një përplasje mes grupeve kriminale. Dyshohet se Behar Bajri e konsideronte Ibrahim Liçin fajtor për vrasjen e ish-efektivit të policisë, Boran Bërçana, dhe bashkëjetueses së tij, Silva Ndoci, të ekzekutuar brenda makinës së tyre.

Hetimet vazhdojnë për të identifikuar të gjithë të përfshirët në krim.