Gjigandi kinez i teknologjisë, Baidu, ka lançuar një model të ri të inteligjencës artificiale, X1, si dhe një version të përmirësuar të Ernie 4.5, duke hyrë fuqishëm në garën globale të AI. Lajmi u raportua nga AFP, ndërsa kompania ka bërë të ditur se Ernie Bot tashmë është i disponueshëm falas për përdoruesit individualë.

Ky hap vjen në një moment kur kompanitë kineze të teknologjisë po intensifikojnë zhvillimin e modeleve të avancuara të AI, pas konkurrencës së ashpër që startup-i DeepSeek krijoi në janar me modelin e tij open-source.

Në një postim në WeChat, Baidu njoftoi se Ernie 4.5 ka kaluar GPT-4.5 të OpenAI në disa teste standarde, ndërsa X1 ka aftësi të përmirësuara në kuptim, planifikim, reflektim dhe zhvillim.

Baidu ishte një nga kompanitë e para në Kinë që lansoi një chatbot të avancuar të AI në 2023. Megjithatë, konkurrenca me kompani si ByteDance (pronar i TikTok) dhe Moonshot AI ka qenë e fortë, duke e detyruar Baidu të përshpejtojë risitë dhe të ofrojë shërbime më të përballueshme për përdoruesit.

Ky zhvillim pritet të forcojë pozitën e Baidu në tregun global të inteligjencës artificiale dhe të rrisë konkurrencën me gjigandët amerikanë si OpenAI dhe Google.