Një tragjedi e madhe ka ndodhur në qytetin lindor të Koçanit, Maqedoni e Veriut, ku 59 persona humbën jetën në orët e para të mëngjesit të së dielës, pas shpërthimit të një zjarri gjatë një koncerti në një klub nate. Përveç viktimave, më shumë se 155 persona janë shtruar në spitale, shumica prej të cilëve në klinikat e kryeqytetit, Shkup.

Kryeministri i Maqedonisë së Veriut, Hristijan Mickoski, ka shpallur shtatë ditë zie për këtë tragjedi të rëndë dhe ka njoftuar se objekti ku ka ndodhur ngjarja kishte një licencë të falsifikuar, e cila ishte lëshuar në mars të vitit të kaluar. Mickoski ka paralajmëruar masa të forta ligjore dhe përgjegjësi penale për të gjithë ata që janë të përfshirë në këtë ngjarje tragjike.

Ministri i Brendshëm, Pançe Toshkovski, ka konfirmuar se zjarri shpërtheu nga mjete piroteknike të përdorura gjatë koncertit për efekt ndriçimi. Ai gjithashtu njoftoi se janë 20 të dyshuar në lidhje me ngjarjen, 15 prej të cilëve janë ndaluar nga autoritetet.

Për të hetuar ngjarjen, Ministria e Brendshme është duke bashkëpunuar me Zyrën e Prokurorit Publik për zbardhjen e plotë të shkaqeve dhe përgjegjësive të tragjedisë.