Një 39-vjeçar nga Kukësi është arrestuar pasi tentoi të fuste rreth 1.2 tonë naftë kontrabandë në Shqipëri, përmes kufirit me Kosovën. Policia Kufitare e Drejtorisë Vendore për Kufirin dhe Migracionin Kukës, gjatë monitorimit të kufirit, ka ndërmarrë një operacion që çoi në arrestimin e shtetasit V. S., banues në Kolesian, Kukës. Ai ishte duke transportuar naftën në një furgon, i cili u ndalua në rrugën rurale Pakisht-Kukës.
Pas kontrollit, në brendësi të furgonit u gjetën dhe u sekuestruan rreth 1.2 tonë naftë, e futur kontrabandë përmes Pakishtit, jashtë pikave të kalimit kufitar dhe duke shmangur kontrollin doganor. Policia ka nisur hetimet për zbardhjen e plotë të këtij rasti.
