Policia spanjolle ka arrestuar një grup kriminal të përbërë nga shtetas shqiptarë, të cilët akuzohen për një seri grabitjesh në vila luksoze në provincën e Valencias.

Sipas mediave vendase, banda vepronte me shpejtësi dhe mjeshtëri, duke hyrë në shtëpi të pabanuara gjatë orarit 07:00 – 22:00. Ata grabisnin para, bizhuteri, pajisje elektronike dhe sende me vlerë, ndërsa shmangnin dhunën ndaj njerëzve. Për të penguar hetimet, anëtarët e grupit ndërronin shpesh rolet dhe vendndodhjet e tyre.

Policia arriti të zbardhë një numër të madh grabitjesh në zona si Betera, Paterna, Ribarroja, l’Eliana dhe San Antonio de Benageber. Arrestimet u kryen në lagjen La Torre të Valencias dhe në qytetin Silla, pas një operacioni të gjatë vëzhgimi me rroba civile dhe përdorimit të mjeteve teknologjike për gjurmimin e kriminelëve.