Drejtuesi Politik i Koalicionit Euroatlantik, Lulzim Basha, ka prezantuar sot kandidatët për deputetë të qarkut të Lezhës, që përfshijnë Prel Dedaj, Aleksandër Jushi, Kejda Myftari, Flora Myrta, Eduart Ndocaj, Kol Nikolli dhe Sander Prenga. Basha ka theksuar angazhimin e Koalicionit Euroatlantik për mbështetje të fuqishme ndaj SPAK dhe reformës në drejtësi.

Në fjalën e tij, Basha ka deklaruar se Koalicioni Euroatlantik është i vetmi që mbështet plotësisht SPAK, duke e cilësuar atë si shpresën e shqiptarëve për të luftuar pandëshkueshmërinë. Ai ka theksuar se, ndryshe nga kundërshtarët që kanë frikë nga drejtësia dhe po përpiqen ta minojnë, demokratët Euroatlantik janë të angazhuar për të dyfishuar mbështetje për SPAK dhe për të forcuar institucionet e drejtësisë, përfshirë vettingun e politikanëve dhe heqjen e imunitetit të parlamentarëve.

Basha gjithashtu nënvizoi se vota për Koalicionin Euroatlantik është një votë për luftën kundër korrupsionit dhe pandëshkueshmërisë. Ai theksoi se koalicioni është i angazhuar për një parlament të barabartë përpara ligjit dhe për të siguruar që çdo politikan të japë llogari për veprimet e tij.

Pjesë nga fjala e Lulzim Bashës:
“Ne, Demokratët Euroatlantikë, Koalicioni Euroatlantikë kemi qëndruar e qëndrojmë pa asnjë dilemë dhe me mbështetjen më të fuqishme pro drejtësisë, pro SPAK, e cila është shpresa e shqiptarëve për t’i dhënë fund pandëshkueshmërisë. Kjo është veçoria e parë që na ndan me të tjerët. Të gjithë të tjerët i ka bashkuar frika ndaj SPAK. Kanë frikë për zullumet, kanë frikë se u kanë hyrë në hak shqiptarëve. Dhe projekti i tyre i përbashkët është ta ngadalësojnë, ta frenojnë, e mundësisht ta shkatërrojnë drejtësinë, para se drejtësia t’i vendos ata para përgjegjësisë.”

Ai e mbylli fjalimin duke shtuar se Koalicioni Euroatlantik është i vetmi që do të dyfishojë mbështetjen për SPAK dhe do të vazhdojë të luftojë korrupsionin dhe pandëshkueshmërinë në Shqipëri.