Deputeti i Partisë Demokratike, Ervin Salianji, ka reaguar ashpër ndaj vendimit të Gjykatës Speciale, e cila nuk i lejoi ish-presidentit të Kosovës, Hashim Thaçi, të merrte pjesë në varrimin e babait të tij. Në një postim në rrjetet sociale, Salianji e cilësoi këtë vendim si një “injorim të ligjit ndërkombëtar dhe shkelje të kodit zakonor shqiptar.”

Ai e konsideroi arrestimin dhe trajtimin e drejtuesve të Ushtrisë Çlirimtare të Kosovës si një padrejtësi jo vetëm ndaj individëve, por edhe ndaj Kosovës dhe historisë së saj. Salianji shtoi se asnjë gjykatë nuk mund të qëndrojë mbi vlerat humane dhe logjikën njerëzore, duke nënvizuar se Kosova duhet ta kundërshtojë këtë padrejtësi përmes zhvillimit, integrimit dhe sundimit të ligjit. Ai gjithashtu shprehu besimin se Hashim Thaçi do të marrë nderimet që i takojnë sipas traditës shqiptare, pavarësisht mungesës së të birit.