Një incident i papritur ka ndodhur me ish-kryeministrin italian Romano Prodi, i cili është parë duke tërhequr flokët gazetares Lavinia Orefici, gjatë një interviste për programin “Quarta Repubblica”. Gazetarja i kërkoi Prodit një koment në lidhje me një pasazh të Manifestit të Ventotenes për bashkimin e Europës, ku flitej për pronën private. Por, Prodi duket se u bë i bezdisur nga pyetja dhe, në një video të publikuar më vonë, shihet kur ai i tërheq flokët gazetares.
Lavinia Orefici reagoi menjëherë, duke e cilësuar këtë veprim si të papërshtatshëm dhe ofendues. Ajo tha se u ndje e poshtëruar si gazetare dhe si grua nga gjesti i ish-kryeministrit. “Presidenti Prodi, përveç se u përgjigj me një ton agresiv dhe frikësues, më kapi një tufë flokësh dhe i tërhoqi. Ishte tronditëse për mua”, shprehet Orefici. Ajo shtoi se ky veprim i Prodit e bëri atë të ndihej e dhunuar dhe jo e respektuar.
Nga ana tjetër, ish-Presidenti i Komisionit Evropian, Romano Prodi, e ka mbrojtur veprimin e tij. Ai ka deklaruar se ky kontakt ishte i rastësishëm dhe nuk kishte asnjë qëllim ofendues. Prodi e cilësoi tërheqjen e flokëve si një veprim që nuk kishte pasur qëllim të dëmtonte gazetarën dhe se ishte bërë pa menduar për pasojat.
