Kryeministri Edi Rama ka komentuar listën e kandidatëve të Partisë Demokratike për zgjedhjet e ardhshme, duke bërë një përjashtim për një deputete aktuale, për të cilën tha se ka respekt, pa e përmendur me emër.

“Të tjerët aty janë… andej nga jugu thonë: Bir Selmani i nënës, kë të qaj më parë,” tha Rama, duke nënkuptuar se lista e PD-së është e mbushur me figura të diskutueshme.

Rama: “Demokratët kanë një arsye më shumë të refuzojnë këtë listë në Shkodër”

Kreu i qeverisë veçoi qytetin e Shkodrës, duke thënë se demokratët atje kanë arsye të forta për të refuzuar alternativën e ofruar nga PD.

“Nëse ka një vend ku demokratët kanë një arsye më shumë për t’iu bërë atë që nuk thuhet në kokë atyre që janë paraqitur si ofertë alternative, është Shkodra. Janë bëmat e tyre në Shkodër,” tha ai.

Duke vazhduar me ironinë, Rama tha se kandidatët e PD-së “pa pikë turpi” kërkojnë vota për Shkodrën Madhështore, ndërsa kritikoi vendosjen e Jozefina Topallit në listën e mbyllur të Tiranës.

“Pa pikë turpi, këta duan vota për Shkodrën Madhështore. Por cila është Shkodra e tyre madhështore? As Jozefina nuk është këtu, se e kanë marrë dhe e kanë mbyllur në burgun e listës së mbyllur të Tiranës,” shtoi Rama.

“Program me qofte e pica”

Në vijim, kryeministri ironizoi programin elektoral të PD-së, duke e cilësuar si të varfër në ide dhe pa vizion të qartë.

“Ky është një program me qofte e pica,” deklaroi ai, duke e krahasuar ofertën e opozitës me diçka sipërfaqësore dhe të paqëndrueshme.

Deklaratat e Ramës vijnë ndërsa fushata elektorale po intensifikohet, me përplasjet mes mazhorancës dhe opozitës që po bëhen gjithnjë e më të ashpra.