Komedianët e njohur rusë, “Vovan & Lexus”, kanë publikuar një video ku pretendojnë se kanë mashtruar kryeministrin e Kosovës, Albin Kurti, duke u paraqitur si presidenti i Letonisë.

Pas publikimit të videos, Zyra e Kryeministrit të Kosovës ka reaguar përmes një postimi në platformën X, ku ka konfirmuar se Kurti ka qenë viktimë e një telefonate të rreme.

Sipas zëdhënësit të Qeverisë, Përparim Kryeziu, thirrja mashtruese ka ndodhur më 11 shkurt, menjëherë pas zgjedhjeve të 9 shkurtit, në një periudhë kur Kryeministri po merrte shumë telefonata dhe mesazhe urimi për rezultatin zgjedhor.

“Për shkak të kufizimeve kohore, verifikimi i plotë i çdo thirrjeje nuk ka qenë gjithmonë i mundur. Kjo situatë e pafat konfirmon atë që dihet prej kohësh: Rusia vazhdon të ndërhyjë në punët e brendshme të Kosovës,” thuhet në njoftimin zyrtar.

Qeveria e Kosovës ka theksuar se gjatë fushatës zgjedhore të 9 shkurtit, mediat pro-ruse Sputnik Serbia dhe Russia Today (RT) kanë publikuar mbi 60 lajme të rreme dhe artikuj dezinformues, duke ndërhyrë në procesin demokratik të vendit.

Në përfundim të deklaratës, Qeveria e Kosovës ka shprehur keqardhje për këtë incident, por njëkohësisht ka nënvizuar se ky rast konfirmon qëndrimin e palëkundur të Kryeministrit Kurti mbi çështjet kyçe, si në biseda publike ashtu edhe private.