Tiranë – Kreu i Partisë Demokratike, Sali Berisha, ka akuzuar qeverinë për rënien e bujqësisë shqiptare gjatë 12 viteve të fundit, duke theksuar se politika aktuale ka kontribuar në falimentimin e mijëra fermave. Ai u shpreh se pas 11 majit, Shqipëria do të dalë nga Ballkani i Hapur dhe ka renditur masat që do të merren për të mbështetur fermerët.
“Made in Albania kërkon një bujqësi të zhvilluar dhe fermerë të suksesshëm,” tha Berisha, duke shtuar se bujqësia ka pësuar një rënie dramatike në vitet e fundit dhe se prodhimi bujqësor dhe blegtoral ka rënë ndjeshëm.
Ai theksoi se pas nënshkrimit të Ballkanit të Hapur, shumë ferma kanë falimentuar dhe prodhimi ka rënë, duke sugjeruar se kjo ka ndodhur për shkak të politikave të qeverisë.
Në programin e tij për bujqësinë, Berisha ka premtuar rritjen e mbështetjes për fermerët, përfshirë subvencionimin e prodhimit për kokë bagëti dhe fidanë të mbjellë, si dhe një rritje të fondit për mbështetje me 5 përqind, duke e çuar në 31 milionë euro. Ai ka nënvizuar gjithashtu nevojën për daljen e menjëhershme të Shqipërisë nga Ballkani i Hapur, që sipas tij, po dëmton bujqësinë dhe blegtorinë shqiptare.
“Karta e ID do të jetë NIPT-i i fermerit,” shtoi ai, duke sugjeruar një regjistrim të detajuar të fermerëve për të siguruar mbështetje më të mirë për sektorin.
