Komisioneri Shtetëror i Zgjedhjeve, Ilirjan Celibashi, ka vendosur pushimin e ankimimit të Partisë Demokratike (PD) lidhur me aktivitetin e kryeministrit Edi Rama më 20 shkurt në sheshin “Skënderbej” me punonjësit e Bashkisë së Tiranës.

Sipas Celibashit, aktiviteti ishte i deklaruar dhe nuk përbënte shkelje të Kodit Zgjedhor.

“Nuk provohet se ka shkelje të dispozitave të Kodit Zgjedhor. Veprimtaria është raportuar dhe nuk vlerësohet si veprimtari politike apo elektorale”, tha ai.

Nga ana tjetër, përfaqësuesi ligjor i PD-së, Marash Logu, e kundërshtoi vendimin, duke e cilësuar atë si të padrejtë dhe në favor të mazhorancës.

“Nëse thuhet se në fjalimin e Edi Ramës në sheshin ‘Skënderbej’ nuk kishte deklarata politike dhe zgjedhore, atëherë nuk është dëgjuar fare se çfarë ka thënë ai. Kjo është një shkelje e qartë e ligjit zgjedhor”, tha Logu.

PD pretendon se punonjësit e bashkisë janë detyruar të marrin pjesë në aktivitet, duke e quajtur këtë një formë presioni politik dhe përdorim të administratës në fushatë.