Dua Lipa nuk ka më nevojë të mbrojë veten nga akuzat për plagjiaturë. Një gjykatë në Manhattan hodhi poshtë padinë për shkelje të të drejtave të autorit, e ngritur nga kompozitorët L. Russell Brown dhe Sandy Linzer, të cilët pretendonin se kënga e saj ‘Levitating’ ishte kopje e hitit të tyre të vitit 1979 ‘Wiggle and Giggle All Night’.
Gjyqtarja Katherine Polk Failla vendosi se nuk kishte një ‘ngjashmëri thelbësore’ mes dy këngëve, duke i dhënë fund kështu çështjes gjyqësore. Kompozitorët kishin pretenduar gjithashtu se ‘Levitating’ kishte përdorur elemente nga kënga ‘Don Diablo’ e Miguel Bosé (1980), por edhe ky argument u hodh poshtë.
Në vendimin e saj, gjykata theksoi se stili muzikor dhe ndjesia disko nuk mund të mbrohen me të drejta autori, pasi kjo do të kufizonte krijimtarinë në të gjithë zhanrin muzikor. Si referencë, gjykata përmendi edhe çështjen e fituar nga Ed Sheeran vitin e kaluar kundër trashëgimtarëve të Marvin Gaye.
Megjithatë, avokati i paditësve, Jason T. Brown, deklaroi se klientët e tij synojnë ta apelojnë vendimin, duke e vazhduar betejën ligjore. Për momentin, Dua Lipa del e fituar, duke mbyllur një nga sfidat më të mëdha ligjore ndaj muzikës së saj.
