Në prag të festës së Fitër-Bajramit, Myftiu i Kosovës, Naim Tërnava, ka shpërndarë një mesazh urimi për besimtarët myslimanë të Kosovës. Ai theksoi se pas një muaji agjërimi, i cili mbushi zemrat e besimtarëve me një ndjenjë të veçantë paqeje dhe miqësie, Fitër-Bajrami është një festë përbashkuese për myslimanët në mbarë botën, duke simbolizuar triumfin shoqëror.

Tërnava theksoi rëndësinë e namazit të Bajramit si mundësi për të falënderuar Zotin për mundësinë e agjërimit dhe për të kërkuar paqe dhe lumturi për vetën, familjen dhe të gjithë besimtarët. Ai e përshkroi festën e Bajramit si një nga festat më të rëndësishme dhe më popullore për popullin shqiptar, duke theksuar ruajtjen e traditave dhe vlerave të solidaritetit, respektit dhe mirësisë.

“Festa e Fitër-Bajramit ka pasur dhe ka një rëndësi dhe vlerë të posaçme për popullin tonë. Është festë e gëzimit dhe nderimit, duke ruajtur traditat dhe duke theksuar vlerat e solidaritetit dhe mirësisë”, tha Tërnava.

Muaji i Ramazanit përfundon më 29 mars, ndërsa dita e parë e Fitër-Bajramit do të festohet të dielën, më 30 mars.