Gjykata e Tiranës ka dënuar me 18 vite burg Axel Hoxhajn, i cili shpallet fajtor për vrasjen e 20-vjeçarit Stivën Toshkëzi. Ngjarja ndodhi më 18 Prill, rreth orës 00:15, në rrugën “Skënder Sallaku” në Tiranë, pranë gjimnazit “Partizani”.

Një tjetër person, Ensi Maze, i cili ishte i pranishëm gjatë krimit, është shpallur fajtor për moskallëzim krimi. Dy të rinjtë kishin pasur një konflikt të vazhdueshëm për një vajzë, që përfundoi me vrasjen e Toshkëzit. Ky konflikt, edhe pse për motive të dobëta, kishte angazhuar dy grupet shoqërore të viktimës dhe autorit. Megjithatë, gjykata e ka konsideruar takimin në mesnatën e 18 Prillit si një ngjarje rastësore, përkundër përpjekjeve të të rinjve për të gjetur vendndodhjen e njëri-tjetrit.

Vrasja e 20-vjeçarit ishte një pasojë e një konflikti të mëparshëm mes Hoxhajt dhe Toshkëzit për një vajzë. Dy javë më parë, Toshkëzi e kishte goditur Hoxhajn pasi i ngacmonte të dashurën e tij. Ata kishin vendosur të takoheshin për t’u sqaruar, dhe gjatë takimit, Hoxhaj i ka zënë pritë Toshkëzit pranë banesës së tij. Ai dyshohet se e ka goditur viktimën me një thikë të madhe në pjesën e brinjëve, duke i shkaktuar vdekjen.