Në një rrëfim drithërues në formatin Big Brother VIP 4, këngëtarja dhe aktorja Rozana Radi ka ndarë betejën e saj të vështirë për të provuar mëmësinë dhe sakrificat që ka bërë në jetë.

“Zemra e vogël nuk rrihte më” – Humbjet që lanë gjurmë

Rozana tregoi se mbeti shtatzënë për herë të parë në moshën 35-vjeçare, por gëzimi i saj zgjati shumë pak, pasi shtatzënia nuk u zhvillua. Pas tre muajsh, ajo e provoi sërish, por zemra e bebit pushoi së rrahuri pas 10 javësh.

“Sapo kuptoja se isha shtatzënë, nuk lëvizja më, kisha frikë se do ta vrisja prapë.”

Pavarësisht përpjekjeve dhe shpenzimeve të mëdha për të realizuar ëndrrën e saj, çdo shtatzëni përfundonte me dhimbje dhe zhgënjim.

Sakrifica për dashurinë dhe vendimi për t’u larguar

Ndërsa luftonte për të pasur një fëmijë, Rozana vendosi të largohej nga partneri i saj, Shpëtimi, sepse nuk donte ta privonte nga e drejta për të pasur një trashëgimtar.

“Kush jam unë që ta mbaj dikë pa i dhënë një fëmijë? Kështu që vendosa ta lë të lirë.”

Në një moment të vështirë emocional, ajo pranoi ftesën për të marrë pjesë në Big Brother VIP, duke marrë me vete dhimbjen, dilemat dhe vendosmërinë për të ecur përpara.

Një jetë mes sfidave dhe humbjeve

Rozana foli gjithashtu për fëmijërinë dhe marrëdhënien e saj të fortë me prindërit. Ajo përjetoi një goditje të rëndë kur babai i saj ndërroi jetë një ditë para provimit të saj në Akademinë e Arteve. Ky moment e tronditi aq shumë sa harroi tekstin në skenë, ndërsa ndiente thellë humbjen e tij.

Pak vite më vonë, ajo humbi edhe të ëmën nga kanceri, duke u detyruar të shiste gjysmën e shtëpisë së saj për të paguar trajtimet e shtrenjta mjekësore.

“Mami largohet nga jeta në moshën 53-vjeçare. Aty mbaroi gjithçka. Shtëpia ime mbeti bosh, mbeta vetëm.”

Motivimi për të mos u dorëzuar

Përkundër dhimbjeve dhe sfidave, Rozana nuk e ka humbur kurrë forcën për të vazhduar. Për të, motra e saj, Andeta, mbetet njeriu më i rëndësishëm në jetë.

“Nëse do t’i kërkoja një gjë Zotit, do të ishte që motra ime të jetonte më shumë se unë, sepse nuk e dua një jetë pa Andetën.”

Edhe pse përjetoi humbje, zhgënjime dhe sakrifica, ajo mbetet e vendosur të realizojë ëndrrën e saj për të qenë nënë, pavarësisht se çfarë e pret jashtë shtëpisë së Big Brother.

“Ky është Big Brotheri i jetës time, i Rozana Radit.”