Pas shtatë ditësh kërkimesh intensive, sot është nxjerrë trupi i pajetë i Ardit Beshirit, 29 vjeç, i cili u zuri poshtë një masiv dheu në zonën minerare të Qafë-Burrelit, në Klos. Ngjarja tragjike ndodhi më 3 maj, kur një shpërthim në një rezervuar shkaktoi rrëshqitjen fatale që e përpiu punëtorin së bashku me eskavatorin e tij.
Trupi i Arditit u gjet disa kilometra larg nga vendi i incidentit, mes tonelatave të mineralit të rrëzuar nga forca e dheut. Kërkimet për gjetjen e tij zgjatën ditë të tëra në kushte jashtëzakonisht të vështira, duke përfshirë rrezikshmëri të lartë gjeologjike, mungesë mjetesh të specializuara dhe vonesë në reagimin institucional.
Babai i viktimës, Nerim Beshiri, bëri thirrje të vazhdueshme për ndihmë dhe përfshirjen e shtetit në kërkime, por ditët e para të operacionit u përballuan kryesisht nga familjarët dhe bashkëfshatarët. Më pas, në ndihmë u angazhua edhe një ekip i Forcave të Sigurisë së Kosovës, i cili kontribuoi ndjeshëm në lokalizimin e trupit në një nga zonat më të thella të rrëshqitjes.
Ngjarja ka tronditur opinionin publik dhe ka rikthyer vëmendjen mbi mungesën e kushteve të sigurisë në zonat minerare, si dhe nevojën për ndërhyrje të shpejtë dhe profesionale në raste fatkeqësish.
