Pas vendimit të Gjykatës Kushtetuese, Komisioni Qendror i Zgjedhjeve ka zyrtarizuar anulimin e zgjedhjeve të pjesshme në Bashkinë e Tiranës, të parashikuara më 9 nëntor.

Në një konferencë të jashtëzakonshme për mediat, kryekomisioneri Ilirjan Celibashi tha se procesi zgjedhor do të vijojë vetëm në 5 bashkitë e tjera, ndërsa për kryeqytetin nuk mund të ndërmerren veprime, pasi vendimi i Kushtetueses ka pezulluar përkohësisht dekretin për zgjedhjet:

“Në momentin kur GJK ka pezulluar atë pjesë për dekretin, është sikur ai dekret të mos ekzistojë përkohësisht. Do të ishim në thyerje të Kushtetutës dhe Kodit Zgjedhor nëse KQZ do të vazhdonte me procesin e zgjedhjeve në Tiranë.”

Celibashi theksoi se çështja tani i takon Gjykatës Kushtetuese, e cila do të shqyrtojë në themel ankimin e kryebashkiakut Erion Veliaj për shkarkimin e tij nga Këshilli i Ministrave. KQZ nuk mund të ndërmarrë asnjë veprim lidhur me zgjedhjet në Tiranë deri në vendimin përfundimtar.

“Bazuar në urdhërimin e GJK, të gjitha institucionet duhet ta respektojnë vendimin. KQZ s’mund të kryejë asnjë lloj veprimi që lidhen me zgjedhjet në Tiranë.”

Ky vendim vendos një ndalesë të qartë për procesin zgjedhor në kryeqytet, duke pritur vendimin final të Kushtetueses mbi ankimimin e Veliajt.