Athinë — Detaje të reja dhe shokuese janë zbardhur nga momentet e fundit të jetës së këngëtarit të njohur grek Giorgos Mazonakis, i cili ndërroi jetë pasi pësoi një arrest kardiak brenda një klinike private në zonën e Kolonakit në Athinë.
Sipas raportimeve nga mediat vendase, përfshirë Star.gr, Mazonakis kishte shkuar në klinikë për t’iu nënshtruar plazmaferezës — një procedurë mjekësore ku plazma ndahet nga qelizat e gjakut — e cila në rastin e tij lidhej me rigjenerimin e qelizave dhe trajtime kundër plakjes.
Këngëtari kishte kryer një takim në klinikë një ditë më parë dhe ishte rikthyer të mërkurën për kryerjen e trajtimit. Gjatë fazës përgatitore, pasi iu vendos një kateter venoz, 54-vjeçari shfaqi dhimbje të forta në gjoks dhe pësoi menjëherë arrest kardiak. Pavarësisht përpjekjeve të gjata të ekipit të urgjencës për reanimim, artisti nuk arriti të mbijetonte.
Ministri i Shëndetësisë ngre pikëpyetje: Klinika pa licencë për procedurën
Ngjarja tragjike ka nxitur menjëherë një hetim të gjerë mbi ligjshmërinë e veprimeve të klinikës private. Ministri grek i Shëndetësisë, Adonis Georgiadis, deklaroi publikisht se ambientet ku ndodhej këngëtari ishin të licencuara vetëm si klinikë patologjike dhe nuk kishin asnjë leje zyrtare për kryerjen e plazmaferezës.
Në kuadër të hetimeve, Policia greke ka marrë në pyetje mjekun pronar të klinikës. Sipas të përditshmes To Vima, ai ka dëshmuar se trajtimin dhe monitorimin e Mazonakis e kishte marrë përsipër bashkëshortja e tij, e cila është po ashtu mjeke me profesion.
Autoritetet po presin rezultatet e ekspertizës mjeko-ligjore për të përcaktuar shkakun e saktë të vdekjes dhe për të verifikuar nëse ka ndonjë lidhje shkakësore mes procedurës mjekësore dhe arrestit kardiak, ndonëse deri më tani nuk është provuar shkencërisht se plazmafereza shkaktoi vdekjen e artistit.