Gjykata e Posaçme ka vendosur pezullimin nga detyra të prefektes së qarkut të Fierit, Rajmonda Balilaj, ndërsa SPAK ka nisur hetimet për dyshimet e shkeljeve në tendera nga Bashkia Patos. SPAK akuzon Balilajn se ka paracakuar kompaninë “Genti 001” në dy tendera, duke bërë shkelje të barazisë në procedurat e tenderimit.
Hetimet përfshijnë edhe disa zyrtarë të Bashkisë Patos, të cilët janë pezulluar nga detyra.
SPAK ka konstatuar se firma në fjalë ka fituar 32 procedura prokurimi brenda tre viteve duke shfrytëzuar ndikimin e Balilaj.
Akuzat përfshijnë edhe shpalljen e fituesit në televizion para se procedurat të finalizoheshin, duke ndikuar në anulimin e tenderit për të favorizuar operatorin “Genti 001”. Në një nga procedurat, SPAK thekson se Balilaj shfaqet në televizion duke njoftuar fillimin e punimeve para se të shpallej fituesi në realitet. Vendimi i gjykatës është marrë më 8 mars, ndërsa masat e sigurimit janë ekzekutuar më 9 mars nga Byroja Kombëtare e Hetimit.
Paracaktoi fituese firmen “Genti 001′ ne tenderin 6.7 mln lekë
Sipas SPAK Balilaj për të favorizuar firmen “Genti 001′ në tenderin për “Ndërtim emergjent të murit mbajtës me gabiona dhe gurë në Dukas-Breg, si pasojë e rrëshqitjes së tokës dhe kthimin e rrugës në gjëndjen e mëparshme”. Nëpërmjet punonjësve të Bashkisë ka marrë hapat për të legjimituar anulimin e procedurës së tenderimit, për të mos u shpallur fitues operatori tjetër pasi nxirrte zbuluar punimet e kryera nga operatori i paracaktuar për të fituar garën.
“E hetuara ka ndërmarrë një sërë hapash nëpërmjet punonjësve të Bashkisë, për të legjimituar anulimin e procedurës së tenderimit, pikërisht për të mos u shpallur fitues operatori “2…..” gjë që do të nxirrte zbuluar punimet e kryera nga operatori i paracaktuar për të fituar garën. Nga hetimi u provua se e hetuara ka paracaktuar fituesin e këtij tenderi, pikërisht operatorin “G……. 001”, i cili është shpallur fitues (që nga viti 2019, kur ky subjekt është regjistruar për herë të parë në QKB deri në vitin 2022, pra për tre vjet) në 32 procedura të organizuara nga Bashkia Patos, thuhet në njoftimin e SPAK.
E shpalli fituesin ne TV një java para
Tenderi nr 2 në të cilin ishte shpallur fituese po firma “G… 001” është ndërtimi emergjent i murit mbajtës në trupin e rrugës në fshatin Ruzhdie, si pasojë e rrëshqitjes së tokës dhe kthim i rrugës në gjendjen e mëparshme”, në vlerën 8,634,380.435 lekë. Sipas SPAK Balilaj është shfaqur në një kronikë televizive në televizionin Apollon të Fierit duke njoftuar fillimin e punimeve ndërkohë që shpallja e fituesit është bërë realisht 10 ditë më vonë.
Në këtë procedurë prokurimi, me Autoritet Kontraktor Bashkia Patos, ish Kryetarja e Bashkisë Patos, R. B., ka paracaktuar fituesin i cili është i njëjti operator “G……. 001”, duke dalë në “Apollon TV” dhe informuar fillimin e punimeve për këtë rrugë, në datën 06.02.2021, në një kohë kur shpallja e fituesit “G……. 001” është bërë në datën 15.02.2021, dhe lidhja e kontratës me autoritetin kontraktor është bërë në datën 16.02.2021, informon SPAK
Zyrtaret e tjerë
Hetimet kanë nisur nga SPAK prej 2021 ndërsa vendimi i GJKKO-së u mor më 8 mars dhe masat e sigurimit ndaj gjashtë të hetuarve u ekzekutuan sot (9 mars) nga Byroja Kombëtare e Hetimit. Për një nga të hetuarit nuk është bërë i mundur ekzekutimi pasi ndodhet jashtë shtetit.
GJKKO ka pezulluar nga detyra edhe Shkelqim Beqirin aktualisht sekretar i Përgjithshëm i Bashkisë Patos; Anisa Petani, ish Nënkryetaren e Bashkisë Patos, aktualisht e punësuar pranë Shoqërisë Rajonale Ujësjellës Kanalizime Fier; Bora Murati, me detyrë secialiste Urbaniste, në Drejtorinë e Urbanistikës, pranë Bashkisë Patos. Ka firmosur detyrim me paraqitje për tre të tjerë: Eneriada Rizai anëtare e Komisionit të Vlerësimit të Ofertave, Vangjel Nushi ish Drejtor i Drejtorisë së Monitorimit dhe Shërbimeve Publike, pranë Bashkisë Patos dhe Arben Manoku, me detyrë ish Inxhinier pranë Bashkisë Patos.
