Shqipëria ka qenë shpesh skenë e skandaleve të mëdha fiskale, por pak prej tyre kanë përmasat e asaj që tashmë njihet si “sekret publik”: shmangia e pagesës së taksave nga kompania Bankers Petroleum, përmes një rrjeti të ndërlikuar nënkontraktorësh dhe kontratash të dyshimta.

Burime të besueshme bëjnë me dije se miliona euro që duhej të përfundonin në arkën e shtetit shqiptar janë zhvendosur sistematikisht, përmes skemave që reduktonin taksat përmes zhvendosjes së fitimit tek kompani të tjera që taksohen më pak. Në qendër të kësaj skeme qëndron përdorimi i kontratave të fryra, tenderëve pa konkurrencë dhe faturimeve të stërmadha për shërbime që në realitet kushtonin shumë më pak.

Pikëpyetjet që presin përgjigje:
• Sa para përfitoi kompania “Bolv Oil” e Behar Çukajt nga kontratat me Bankers?
• Sa nga këto kontrata ishin të hapura dhe sa të mbyllura?
• Cili ishte çmimi real i shërbimeve dhe sa u pagua në të vërtetë?
• Sa tatim-fitim u shmang duke e zhvendosur fitimin nga Bankers (tatim 50%) tek Bolv Oil (tatim 15%)?

Të njëjtat dyshime ngrihen për kompaninë “Albstar” të Sadik dhe Idajet Ismailajt, një emër që ka ndërtuar gjithçka, nga stadiumet deri te koncesionet shumëmilionëshe. Pyetjet janë të njëjta, por përgjigjet deri tani mungojnë.

Aty ku “rruga e parave” të çon…

Nëse hetimi do të jetë serioz, “rruga e parave” mund të përfundojë në rezidencat luksoze të ndërtuara me para publike, si “Tulipan” në Tiranë apo “Pika e Vogël e Kumbaros” në Jug, ku shumëkush dyshon se është kanalizuar një pjesë e kësaj pasurie të zhdukur.

Nuk janë vetëm dy apo tre kompani, por dhjetëra emra që sipas të përditshmes “Kapitali”, përfshijnë:
• “Simmons Edeco Limited” me përfaqësues Enea Nuhun;
• “Q. Sinaj” e Fatos dhe Qemal Sinaj;
• “Phoenix” e Isuf Berberit;
• Dhe të tjera që kanë përfituar kontrata të majme nga Bankers për vite me radhë.

Pyetja që mbetet:

A ka vullnet politika dhe prokuroria të shkojnë deri në fund të kësaj çështjeje? Apo do të heshtin sërish përballë një prej aferave më të mëdha financiare në Shqipëri?

Nëse drejtësia do ta trajtojë këtë dosje me përkushtim, shumë nga paratë që i mungojnë shkollave, spitaleve dhe infrastrukturës publike, mund të rikthehen tek qytetarët shqiptarë. Por për këtë, nevojitet më shumë se një deklaratë politike: nevojitet vullnet për të ndëshkuar grabitjen sistematike të pasurisë publike.