Komisioni Qendror i Zgjedhjeve (KQZ) ka konfirmuar se është në kontakt me Dhomat e Specializuara të Hagës për të mundësuar votimin e ish-luftëtarëve të Ushtrisë Çlirimtare të Kosovës, të cilët po gjykohen në Hagë, në zgjedhjet e parakohshme të 9 shkurtit.

Zëdhënësi i KQZ-së, Valmir Elezi, ka deklaruar se procesi i votimit për këta shtetas do të organizohet në përputhje me rregullat e KQZ-së.

“Mund t’iu konfirmoj se Komisioni Qendror i Zgjedhjeve është në kontakt me Dhomat e Specializuara për organizimin e votimit për shtetasit e Kosovës që ndodhen në Hagë. Procesi i votimit do të organizohet në përputhje me rregullat e KQZ-së,” tha Elezi.

Kjo çështje ka ngjallur interes të madh publik, duke pasur parasysh rëndësinë e votës së tyre në zgjedhjet e ardhshme. Ende nuk ka detaje mbi mënyrën e organizimit të votimit, por pritet që KQZ dhe autoritetet përkatëse të dalin me një vendim përfundimtar në ditët në vijim.