Kryetarja e LSI-së Monika Kryemadhi ka vijuar me denoncimet e saj për aferën e inceneratorëve, ndërsa i bëri një pyetje publike dhe kryeministrit Edi Rama, që sipas saj është pronari i vërtetë i tyre.

Kryemadhi kërkoi të dijë nga Rama, se ku është investimi 128 milionë eurosh, që ai ka deklaruar në Komisionin Hetimor të Inceneratorëve, se është bërë në Tiranë.

Kryetarja e LSI-së i bëri thirrje SPAK-ut që të ndërpresë sa më parë kontratën e lidhur për inceneratorin e Tiranës, duke i shpëtuar çdo ditë Buxhetit të Shtetit një shifër prej 80 mijë eurosh.

Kryemadhi:

Ministrja dje pranoi se qenkan 500 kompani të tilla që kryejnë evazion fiskal, unë kam vetëm një pyetje për ministren (Delina Ibrahimaj), a ka audituar ajo inceneratorët e Fierit, Tiranës, Elbasanit? Nëse këto kompani kanë bërë evacion që në 2018, a ka pasur një hetim deri në përfundim.

Kam një pyetje për Edi Ramën, pronarin e vërtetë të inceneratorëve, cili është investimi që është bërë në inceneratorin e Tiranës, ku u zhdukën 128 milionë euro që ti ke deklaruar? Ajo që ne shohim është vetëm kapanon për jonxhë, dhe ca rrugë të ngushta që janë shtruar.

Pjesëmarrja e qytetarëve të Tiranës në protestë, tregon se kanë kuptuar grabitjen që po iu bëhet çdo ditë.

I bëj thirrje SPAK, që çdo ditë që zgjatet afera e inceneratorit të Tiranës, janë 80 mijë euro më pak në buxhetin e shtetit. Vepra penale e koncensionit të paligjshëm, Erion Veliaj nuk shpëton deri në sekondën e fundit.