Nënkryetari i Parlamentit dhe deputeti i Partisë Demokratike, Agron Gjekmarkaj, dënoi ashpër përdorimin e gjuhës nga kryetari i grupit parlamentar të PS-së, Taulant Balla, ndaj deputetes Albana Vokshi.

Në reagimin e tij, Gjekmarkaj theksoi:

“Dënoj me indinjatë të thellë gjuhën e ulët dhe fyese të përdorur sot nga Taulant Balla ndaj deputetes Albana Vokshi në sallën e Kuvendit të Shqipërisë. Shprehje të tilla vulgare dhe denigruese, që synojnë të poshtërojnë një grua dhe një përfaqësuese të zgjedhur të qytetarëve, janë një akt i papranueshëm që turpëron institucionin e Parlamentit dhe degradon rëndë etikën e debatit politik në vend.
Kur një drejtues i një grupi parlamentar përdor një gjuhë të tillë, ai nuk fyen vetëm një deputete, por ofendon çdo grua shqiptare dhe vetë dinjitetin e institucionit që përfaqëson.”

Gjekmarkaj shtoi se sjellje të tilla tregojnë mungesë respekti, arrogancë dhe një kulturë politike ku argumenti është zëvendësuar nga fyerja, duke kërkuar ndërhyrjen e drejtuesit të Kuvendit:

“Kërkoj publikisht nga drejtuesi i Kuvendit të Shqipërisë që të reagojë dhe të mos tolerojë këtë degradim të papranueshëm të etikës parlamentare.”

Ky reagim reflekton shqetësimin për degradimin e debatit politik dhe për keqtrajtimin e grave në institucionet publike.