Zëvendëskryeministri Arben Ahmetaj, ka folur në Kuvend në lidhje me rritjen e çmimeve, dhe masat e ndërmarra nga qeveria sipas tij, në mbrojtje të shtresave në nevojë. Ahmetaj tha se nuk ka vend të debatohet mbi arsyen e rritjes së çmimeve, pasi sipas tij dihet se kjo është efekt i luftës në Ukrainë.

Sa i takon kërkesës së disa prej deputetëve të opozitës për heqjen e taksës mbi çmimin e naftës, Ahmetaj tha se kjo do ta fuste vendin në një spirale ekonomike.

Pjesë nga fjala e Ahmetajt:

Debati është i domosdoshëm, në mënyrë që secila palë të shfaqë veten. A ka më debat që të mos e dimë arsyen e rritjes së çmimeve? Kemi më debat? Jo nuk kemi më debat, çmimet janë pasoja të luftës që po ndodh në Ukrainë.

Është e çuditshme që çmimi i grurit dhe miellit është rritur? Kur dy vendet janë prodhueset më të mëdhaja të grurit dhe misrit në të gjithë botën. Një vend si i yni nuk mund të bëjë dot asgjë për të ndalur rritjen e çmimeve. A e dini se në Gjermani në raport me disa vite më parë çmimi i energjisë është rritur me 500%.

Më e rënda ndoshta nuk ka ardhur akoma, çfarë ka bërë kjo qeveri, përveç vendosjes së 280 milionë dollarëve në buxhet për energjinë, ka subvencionuar energjinë për familjarët dhe biznesin e vogël.

Ndërkohë që nuk kemi prekur asnjë projekt. Kemi vendosur që projektet të vazhdojmë, që të mos hyjmë në atë që quhet spirale ekonomike, unë e di që shumica nga ju shtiret kur na thotë që të heqim taksat.

Pasi shumica prej jush e dini që po të hiqen taksat, vendi do të kalonte në kolaps.