Ministria e Kulturës në Greqi urdhëroi mbylljen e Akropolit në Athinë për disa orë në mes të ditës së mërkurën, për shkak të motit ekstrem që ka përfshirë pjesën më të madhe të vendit. Ky vendim erdhi ndërsa Evropa Jugore është goditur nga një valë nxehtësie që ka sjellë rritjen e ndjeshme të temperaturave.

Meteorologët paralajmëruan se temperaturat e larta do të vazhdojnë për disa ditë, të paktën deri të dielën, me pritshmëri që sot dhe nesër temperaturat të arrijnë deri në 43 gradë Celsius. Akropoli, një nga pikat më të njohura turistike në Athinë, ka tërhequr shumë vizitorë që shpresonin të shihnin tempullin e Partenonit. Turistët u këshilluan të vizitonin vendin në mëngjes për të shmangur të nxehtin ekstrem. Organizata e Kryqit të Kuq ishte në vend për të dhuruar shishe me ujë dhe fletushka informuese për njerëzit që prisnin në radhë.

“Erdha para 10 minutash, por është shumë nxehtë. Mjaftuan 10 minuta që ta ndjej atë,” tha Jordan Lilley, një turist nga Britania.

Zyrtarët u kanë bërë thirrje qytetarëve të qëndrojnë në mjedise të mbyllura me ajër të kondicionuar, të shmangin ekspozimin në diell gjatë orëve më të nxehta të ditës, dhe të pijnë ujë rregullisht për të shmangur dehidratimin. Nxehtësia dhe thatësirat kanë shkaktuar zjarre në disa zona, përfshirë një zjarr të fuqishëm në pyjet e Korinthit, në jug të Greqisë.