Një aksident i rëndë rrugor është regjistruar këtë të diel, rreth orës 17:05, në aksin nacional Prrenjas–Librazhd, në zonën e Qukësit, pranë vendit të njohur si “Lokali i Zenelit”.

Sipas informacioneve paraprake, tre automjete janë përfshirë në përplasje, duke shkaktuar plagosjen e tre qytetarëve, mes tyre një në gjendje të rëndë shëndetësore. Të lënduarit janë transportuar me urgjencë drejt spitalit nga ekipet e ambulancës.

Si pasojë e përplasjes janë regjistruar dëme të konsiderueshme materiale, ndërsa qarkullimi i automjeteve në këtë segment po vijon me vështirësi, vetëm në një krah të rrugës, çka ka sjellë vonesa në lëvizje për drejtuesit e mjeteve.

Në vendngjarje kanë mbërritur menjëherë forcat e policisë, si dhe ekipet e zjarrfikëses të Bashkisë Prrenjas, të cilët kanë ndërhyrë për nxjerrjen e të plagosurve nga mjetet, si dhe për pastrimin e rrugës për të rregulluar qarkullimin.

Shkaqet e aksidentit mbeten ende të paqarta, ndërkohë që grupi hetimor po punon për zbardhjen e plotë të rrethanave të ngjarjes. Autoritetet u bëjnë thirrje drejtuesve të mjeteve të tregojnë kujdes të shtuar në lëvizje, veçanërisht në segmentet problematike të qarkullimit.