Një aksident i rëndë rrugor ka ndodhur paraditen e sotme në aksin që lidh qytetin e Vlorës me zonën turistike të Zvërnecit, ku janë përfshirë tre automjete dhe pesë persona kanë mbetur të plagosur, përfshirë një fëmijë.

Sipas burimeve paraprake, një familje me targa italiane po udhëtonte drejt Zvërnecit kur makina e tyre është përplasur me dy mjete të tjera. Përplasja ka qenë e fortë, duke shkaktuar dëmtime të konsiderueshme në pjesën e përparme të automjeteve.

Menjëherë pas sinjalizimit, në vendin e ngjarjes kanë mbërritur ambulancat dhe patrullat e Policisë Rrugore, të cilët kanë transportuar të plagosurit në Spitalin Rajonal të Vlorës. Burime nga spitali bëjnë me dije se dy prej të plagosurve ndodhen nën kujdes të veçantë mjekësor për shkak të lëndimeve serioze.

Policia ka nisur hetimet për të zbardhur shkaqet e aksidentit, ndërsa dyshohet se shpejtësia dhe pakujdesia në një zonë me qarkullim të shtuar kanë qenë faktorët kryesorë që shkaktuan përplasjen.

Nga aksidenti janë shkaktuar dëme materiale të konsiderueshme në të tre automjetet, ndërsa qarkullimi në zonë ka patur vështirësi deri në largimin e mjeteve të dëmtuara.

Aksi Vlorë-Zvërnec është një prej rrugëve më të ngarkuara gjatë sezonit turistik, duke rritur rrezikun për aksidente të tilla.