Një aksident i rëndë rrugor ka ndodhur paraditen e së dielës në fshatin Muriqan të Shkodrës, ku një 16-vjeçar që drejtonte një motomjet ka humbur kontrollin dhe është përplasur me një biçikletë të drejtuar nga një 76-vjeçar.

Sipas njoftimit zyrtar të Policisë, ngjarja ka ndodhur rreth orës 10:20, kur adoleshenti ka humbur kontrollin e motorit dhe ka përplasur biçikletën që po drejtohej nga shtetasi M. L., banor i zonës.

Si pasojë e përplasjes, i moshuari ka pësuar dëmtime të rënda dhe ndodhet në Spitalin Rajonal të Shkodrës, ku po trajtohet nën kujdesin e mjekëve.

Grupi hetimor ndodhet në vendngjarje dhe po punon për sqarimin e plotë të rrethanave të aksidentit, ndërkohë që nuk dihet nëse 16-vjeçari kishte leje drejtimi për motorin që përdorte.

Ngjarja ka rikthyer në vëmendje edhe njëherë problematikën e përdorimit të mjeteve motorike nga të miturit dhe nevojën për kontrolle më të rrepta në zonat rurale.