SARANDË – Një aksident i rëndë rrugor ka ndodhur pasditen e së hënës në fshatin Buronjë, përgjatë segmentit rrugor Sarandë – Delvinë, ku një automjet i tipit ‘Toyota Auris’ ka dalë nga rruga dhe ka rënë nga një urë, duke lënë të plagosur rëndë drejtuesin e mjetit, 62-vjeçarin Nishan Ballaci.

Sipas dëshmive të banorëve të zonës, të cilët u gjendën të parët në vendin e ngjarjes, shoferi udhëtonte i vetëm dhe automjeti përfundoi në një kanal poshtë urës. Ata ndërhynë menjëherë për ta nxjerrë të lënduarin dhe për të dhënë ndihmën e parë.

Ballaci u transportua fillimisht në Spitalin Rajonal të Sarandës, ndërsa më pas, për shkak të gjendjes së rëndë shëndetësore, u dërgua me ambulancë drejt Spitalit të Traumës në Tiranë, për trajtim të specializuar.

Në vendngjarje ndodhen shërbimet e qarkullimit rrugor të Sarandës, të cilat kanë nisur hetimet për të përcaktuar shkaqet e aksidentit. Deri tani, nuk janë dhënë detaje nëse bëhet fjalë për humbje kontrolli, probleme teknike apo faktorë të tjerë.