Lezhë – Një aksident rrugor është regjistruar mbrëmjen e djeshme në aksin Lezhë–Milot, ku një automjet ka përplasur një motoçikletë, duke lënë të plagosur drejtuesin e kësaj të fundit.

Sipas burimeve nga vendngjarja, i plagosuri është transportuar menjëherë në spitalin rajonal të Lezhës, ku po merr ndihmën e nevojshme mjekësore. Fatmirësisht, gjendja e tij shëndetësore raportohet të jetë jashtë rrezikut për jetën.

Ndërkohë, policia ka mbërritur në vendngjarje dhe ka nisur hetimet për zbardhjen e plotë të rrethanave të aksidentit. Deri tani, shkaqet e saktë të ngjarjes nuk janë përcaktuar, ndërsa pritet të merren në pyetje dëshmitarët dhe të analizohet dinamika e përplasjes.

Ky aks rrugor, një ndër më të frekuentuarit në veri të vendit, mbetet problematik përsa i përket sigurisë rrugore, me disa aksidente të ndodhura gjatë muajve të fundit. Autoritetet apelojnë për kujdes të shtuar ndaj drejtuesve të mjeteve, sidomos në orët e vona të mbrëmjes kur shikueshmëria është më e ulët.