Një aksident tragjik ka ndodhur pak më parë në aksin rrugor Pogradec-Qafë Thanë, ku ka humbur jetën shtetasi Martin Kastrioti. Sipas raportimeve të gazetares Lorena Kodra, nga ky incident janë lënduar dy persona të tjerë, të cilët ndodheshin në automjetin tjetër të përfshirë në përplasjen.

Martin Kastrioti është 34-vjeçari që humbi jetën ditën e sotme në aksidentin tragjik të ndodhur në aksin Pogradec-Qafë Thanë.

Në afërsi të fshatit Pojskë, Kastrioti që po lëvizte me një mjet tip “Volkswagen”, është përplasur kokë më kokë me një automjet ku udhëtonin dy persona, burrë e grua.

Sipas policisë, një nga mjetet ka kryer një manovër të gabuar, çka ka çuar në përplasjen e dy mjeteve që udhëtonin në drejtime të kundërta. Përplasja ka qenë aq e fortë sa që mjeti ku udhëtonte viktima, Martin Kastrioti, është shkatërruar pothuajse plotësisht.

Ekspertët e hetimit kanë përmendur disa faktorë si shkaktarë të aksidentit, duke përfshirë shpejtësinë tej normave të lejuara, manovrën e gabuar dhe lagështinë në rrugë si elemente që kanë kontribuar në këtë tragjedi.

Policia ka nisur hetimet për të sqaruar plotësisht shkaqet e aksidentit, ndërsa dy të plagosurit po marrin trajtim mjekësor në spital.