Një aksident rrugor ka ndodhur sot paradite në fshatin Grudë-Fushë, përgjatë aksit Shkodër-Koplik. Një fuoristradë e drejtuar nga shtetasi Albert Pali, 21 vjeç, ka përplasur një motoçikletë në të cilën udhëtonin dy të mitur, të dy të moshës 14 vjeç. Nga përplasja, të rinjtë kanë pësuar plagë të konsiderueshme, por fatmirësisht ndodhen jashtë rrezikut për jetën dhe po marrin kujdesin e nevojshëm mjekësor.

Grupi hetimor dhe forcat e policisë kanë mbërritur në vendngjarje dhe po punojnë për të zbardhur rrethanat dhe shkaqet e këtij incidenti. Autoritetet janë duke mbledhur informacione për të përcaktuar shkaqet që çuan në aksidentin e rëndë, ndërkohë që kanë bërë thirrje për kujdes të shtuar në këtë aks rrugor të rrezikshëm.

Në deklaratën zyrtare, policia njoftoi: “Në aksin rrugor Shkodër-Hani i Hotit, automjeti me drejtues shtetasin A. P., 21 vjeç, ka përplasur motomjetin me drejtues një të mitur 14-vjeçar. Si pasojë janë dëmtuar dy të mitur 14-vjeçarë, që po lëviznin me motomjet, të cilët ndodhen nën kujdesin e mjekëve, jashtë rrezikut për jetën. Grupi hetimor po punon për sqarimin e rrethanave dhe shkakut të aksidentit.”