Një çift bashkëshortësh ka mbetur i plagosur pas një aksidenti automobilistik pasditen e sotme në zonën e ish-Kënetës në Durrës.

Sipas burimeve, automjeti me të cilin ata po udhëtonin u përplas me një shtyllë që ndodhet në mes të karrexhatës. Dëshmitarët në zonë raportojnë se çifti, të dy rreth 57 vjeç, ishin të ardhur nga Greqia dhe po lëviznin nëpër rrugën e sapoasfaltuar, kur ndodhi përplasja.

Banorët e zonës shprehin shqetësimin se shtylla nuk është zhvendosur, pavarësisht rikonstruksionit të rrugës, duke u kthyer në një rrezik serioz për drejtuesit e mjeteve.

Ndërkohë, autoritetet po hetojnë shkaqet e aksidentit dhe përgjegjësinë për lënien e pengesës në rrugë. Gjendja shëndetësore e çiftit ende nuk është bërë e ditur.