Një tjetër aksident është regjistruar këtë fundjavë në Lushnjë, në afërsi të rrethrrotullimit të Kolonjës.

Sipas informacioneve të para, janë përplasur tre automjete dhe për pasojë katër persona janë transportuar në spitalin e Lushnjës për ekzaminime mjekësore. Fatmirësisht, të lënduarit ndodhen jashtë rrezikut për jetën.

Policia rrugore ndodhet në vendngjarje dhe po kryen procedurat e nevojshme për zbardhjen e plotë të dinamikës, si dhe po punon për normalizimin e trafikut, i cili është rënduar ndjeshëm këtë fundjavë.

Dyshohet se shkak i përplasjes ka qenë lagështira në rrugë, çka ka bërë që një nga mjetet të mos arrijë të frenojë në kohë, duke goditur makinën para tij, e më pas u godit nga pas nga një tjetër automjet.