Një aksident i rëndë ka ndodhur mbrëmjen e djeshme në rrugën e vjetër Vlorë-Fier, në zonën e Bestrovës. Një automjet i tipit Porsche ka humbur kontrollin dhe është përplasur me barrierën mbrojtëse, e cila ka depërtuar brenda automjetit, duke shkaktuar lëndime për tre të rinjtë që udhëtonin në të.

Sipas policisë, drejtuesi i mjetit, një 31-vjeçar me inicialet K. L., ka qenë në gjendje të dehur dhe për pasojë ka humbur kontrollin e mjetit. Pas aksidentit, drejtuesi dhe dy pasagjerët e tij, shtetasit O. Ç., 32 vjeç, dhe A. A., 27 vjeç, janë dërguar menjëherë në spital. Njëri prej tyre ka marrë lëndime më të rënda se dy të tjerët, por fatmirësisht, të tre ndodhen jashtë rrezikut për jetën.

Në deklaratën e mbrëmshme, policia raportoi: “Rreth orës 20:50, në aksin rrugor Vlorë-Fier, pranë fshatit Bestrovë, shtetasi K. L., 31 vjeç, dyshohet se duke drejtuar automjetin tip ‘Porsche’ në gjendje të dehur, ka humbur kontrollin mbi drejtimin e automjetit, duke dalë nga rruga. Si pasojë e aksidentit është dëmtuar drejtuesi i automjetit, shtetasi K. L., si dhe pasagjerët, shtetasit O. Ç., 32 vjeç, dhe A. A., 27 vjeç, të cilët ndodhen në spital, jashtë rrezikut për jetën.”

Policia dhe grupi hetimor ndodhen në vendngjarje dhe po vazhdojnë hetimet për zbardhjen e plotë të shkaqeve të aksidentit.